Matupi peng chung ah CDF ralkap 6 nih SAC ralhrang sin ah an i ap i, an chungkhar sin ah him tein kan ap ṭhan hna, tiah SAC ralhrang a dirkamhtu thawngzamhnak pawl nih an langhter.
Nihin February 17 ah Tamu, Pakuko, Shwebo le Matupi khua hna ah SAC ralhrang sin ah anmah lungtho tein aa ap ṭhanmi PDF le CDF ralkap pawl cu an chungkhar hna sin ah apnak kan tuah hna, tiah SAC ralhrang nih thawng an thanh.
Matupi khua zong ah cu apnak puai cu an tuah i, CDF ralkap an si tiah SAC ralhrang nih an timi pa 5 le nu 1 cu bawmhnak thilri kan pek hna hnu ah chungkhar sin ah kan ap hna, tiah an langhter.
Hi kong he pehtlai hin CDF-Matupi nih thawngpang an langhtermi a um lo bang in CDF ralkap an si ngaingai le si ngaingai lo zong fiang in theih a si rih lo.
Kha hlan ah khan Irrawaddy ramṭhen chung ah a ummi PDF pawl anmah tein an i ap i, nulepa sin ah kan ap ṭhan han, tiah SAC ralhrang nih an rak thanh bal.
Asinain, Irrawaddy ramṭhen chung ah a cawlcangmi PDF ralkap bu nih cun SAC ralhrang sin ah an i ap tiah an timi pawl hi kanmah PDF ralkap bu chung i minung ngaingai an si hna lo, tiah an chim.
