Matupi peng in Mizoram ah chungkhar he a zaammi Pi Sang Li (kum 31) hi fa pali a ngeimi a si i, Mizoram an zaam lio ah pumlawnglo in a ummi a si.
Naupawimi a si caah harsa ngaiin Mizoram ah an chungkhar te in an panh. Lawngtlai khuapawng ralzaam camp ah an chungkharte in an um i, a fale fim an cawn khawh nakhnga biatak tein aa zuam.
“Mizoram kan rak phak ah hin tangka zong fak khat hmanh kan ngei ti lo. Sizung ah nau ngeih nakding tangka hmanh kan ngei lo. Asinain, Pathian dawtnak thawng in sizung rianttuantu hna nih tlamtling tein aa kan zohkhenh i nau zong dam tein kaa tthen kho,” tiah a chim.
Pi Sang Li nih Mizoram ralzaam camp ah biapi bik in a tuaktaanmi cu a fale fimnak an hmuh khawh nakding a si.
“Ka fale hi cacawng kho loin an um sual lai timi ka phang tuk. Kan pa hi zarh khat ah ni hnih hrawng rian a ttuan (Rian a um caan ah). Cu rian a ttuanmi te cun kan fale hi a si khawh chung in ralzaam camp ah ca kan cawnter hna,” tiah a chim.
Kan ram a tthat tthan hin cu kan ram lei ah kir tthan colh kan duh ko. Kan ram ah cun Leikuang zong kan ngei. Innzuat sattil zong tampi kan ngei i nuam tein khua kan sa kho, tiah a chim.
