Ruatuai Kawl in Nitin Pawcawmnak a Kawlmi Mizoram Phan Chin Ralzam

Mizoram, Lawngtlai khua pawng Bethel sang ralzam camp ah a ummi hna hi nihin pawcawmnak caah ramlak ah ruatuai an kawl i Lawngtlai khuapi ah an vung zuar tawn hna.

Matupi khua in Bethel sang ralzaam camp ah a phanmi Chin nutung pakhat nih ruatuai zuar in pawcawmnak rian harsa ngaiin an ttuan ning kong a chim.

“Hika kan phanh kaa ah cun tuah awk kan theih lo. Atu cu ruatuai hi kan kawl ve. Zingka sumilam paruk hrawng in ruatuai kawl kan i thawh i, suimilam pakua hrawng ah inn ah kan phan tthan. Ni khat ah hin (India tangka) rupee 300 in 350 karlak kan hmu,” tiah a chim.

Ruatuai hi August thla hnu cun a um ti lai lo caah hmailei pawcawmnak caah a lungretheihnak a langhter chap.

 “Atu August thla a dih hin cun ruatuai kawl awk a um ti lai l0. A um lio ah hin cun zarh khat ah voi khat cu kan kawl lengmang ko. Asinian, ruaituai a um ti lo hnu cun zei rian dah kan ttuan lai timi hi thei khawh a si lo,” tiah a chim.

Mizoram mibawmtu hna nih ralzaam hna caah facang cu an bawmh zungzal hna. Asinain, a dangdang zalhnak ca ah anmah tein kawlhawl a hau ve.

“Facang hi cu a kan bawmh ko. Ruatuai kan zuarmi hi kan ca ah tthathnemnak tampi a um ve. Chiti, aalu tibantuk mehmoi cawknak caah tthathnemnak tampi a kan pek. Harnak tampi cu a um ve. Chukcho kan kai, cangvok zong a tam. Asinain, kan ttuan lo ahcun zeidah kan ei lai. Cucaah a har zong  ah kan ttuanmi a si,” tiah a chim chap.

Matupi khua cun dawr an ngeih pin ah dum zong tampi an ngei. Wa-Uh zong an cing i, nun nuam in khua a sami an si.

“Kan ram a tthat cun kan ram ah kan kir lai. Kan ram ah cun dum zong tampi kan ngei ve. Wa-uh zong kan cing. Dawrthil zong kan zuar. Kan ram kan kir khawh hlan cu hitihin kan um a hau ko lai,”  tiah a chim.

Hnubik Thawngpang

January 10 – Camp Victoria ah nunnak a pemi CNA ralkap hna

January 10 ah Camp Victoria cu SAC ralhrang nih vanlawng in an run kah taktak i CNA ralkap nu 2 le pa 3 nih miphun luatnak rian an tuan cuahmah lio ah a kan liamtak. January 11 ah SAC ralhrang nih Camp Victoria cu a voi 2nk a kah than.

FEATURE STORY

English Version