Thailand-Myanmar ramri ah Myanmar lei in Thailand ramchung ah a lutmi ritsii phortu pawl le Thailand ralkap karlak ah kahdohnak a chuak i ritsii phortu minung 15 an thi, tiah Thailand ramchung thawngzamhnak The Nation nih a ṭial.
Nizaan December 7, zaanlei ah khan Thailand-Myanmar ramri, Thailand ramchung ah Myanmar lei in a rak lutmi ritsii phortu minung 40 hrawng cu Thailand ralkap Pha Muang Task Force nih an bawh hna i an kah hna.
Kap hnih karlak kahdohnak minute 10 chung hrawng a rau i, ritsii phortu pawl cu Myanmar ram lei ah an kir ṭhan, tiah Thailand nawlngeihtu nih an chim.
Ritsii phortu pawl an zaam dih hnu ah Thailand ralkap nih pawngkam thianhnak an tuah tik ah ritsii phortu miruak 15 le ritsii (Crystal Meth) an phorhmi tom 29 an char.
“Atu ritsii phortu pawl an ratnak lam hi ahlan zong ah ritsii phorhnak ah an hman zungzalmi a si. An phorhmi ritsii pawl hi Myanmar ram in a rak lutmi a si ngaingai le si ngaingai lo hlathlainak kan tuah lai,” tiah Thai nawlngeitu hna nih an chim.
Kahdohnak a chuahnak hmun hi ritsii phorhnak lampi a si i, Thailand ralkap nih timh cia tein an bawh hna hnu ah atu bantuk in kahdohnak a chuah hi a si.
