Atutan 2020 World Cup Semifinals ah Argentina nih an tei hna nain Croatia laikal (Midfielder) Luka Modric hi vawleicung media nih an thangṭhat ngaingaimi a si.
Kum 37 a si cang nain atulio Croatia National Football Team ah an bochan bikmi a si. Russia ram ah an rak tuahmi 2018 World Cup ah Croatia Team cu Final tiang a phakpi khawh hna.
Bawlung vawlei in aa dinh zong ah vawleicung bawlungchuihnak tuahbia ah Laikal minthang a simi Zidane, Iniesta le Xavi tibantuk pawl he level khat in tuanbia catlap ah a min khenh a si lai, tiah thawngzamhnak pawl nih an langhter.
Argentina nih 3-0 in Semifinal ah an tei hna hnu ah Messi kong he pehtlai in Argentina thawngzamhnak nih bia an hal i, a tanglei bantuk hin Modric nih a chim:
“Atutan World Cup ah Messi nih teinak a hmuh nakhnga ka ruahchan ko. Messi cu vawleicung tuanbia ah bawlungchuih thiam bik a si bang in hi World Cup ah teinak hmuh ding in aa tlak tiin ka ruah,” tiah a chim.
Cun, atutan Argentina he puai hi a donghnak bik ram caah na chuih a si maw? tiah an hal i, Modric nih, “Atu ah mah kong chim hi cu a tuan tuk rih ka ti. Zarhte ni ah pathumnak cuh puai zong kan chuih rih lai,” tiah a leh hna.
Nizaan Argentina he puai ah minute 80 hnu ah Modric cu an thlen. Cerhtual in a chuah lio ah mipi an dir hna i, zapei bengh in upatnak an pek.
