A Fale 2 a Thah hna Hnu ah an Ruh Suitcase Chung ah a Rawn Hna

New Zealand ram ah a fale pahnih a thah hna i an ruhkhua pawl Suitcase chung ah a rawngtu South Korea nu (kum 42) cu nizaan September 15 zaan ah South Korea ram Ulsan khua ah an tlaih, tiah BBC nih a ttial.

Hi South Korea nu hi New Zealand ram Aukland khua ah caan saupi a rak ummi a si i, Suitcase chung ah a rawnmi a fale ruhro pawl cu kan hnu thla August 2022 ah Aukland khua ah a ummi chungkhar pakhat nih an hmuh.

Aukland ah a ummi chungkhar pakhat nih online in Suitcase pahnih an cawk i, ruah lo piin an cawkmi Suitcase chung ah ngakchia ruhkhua pawl an hmuh hi a si.

Suitcase chung ah an hmuhmi ngakchia ruh pawl hi an thihnak kum 3 in kum 4 hrawng a rau cang lai, tiah Aukland palik Tofilau Faamanuia Vaaelua nih a chim.

A fale a thattu South Korea nu cu aluancia 2018 ah khan South Korea ram ah a rak zaam cang. Aukland palik nih hlathlainak fak piin an tuah hnu ah vawleicung palik bu (Interpol) thawng an thanh hna i, a fale a thattu nu cu South Korea ram Ulsan khua ah a zaam timi an theih.

Hringtu nu nih a thahmi hna ngakchia pahnih hi kum 7 le kum 10 hrawng an si lai tiah an zumh.

Mithattu nu cu nizaan zaanttim ah khan South Korea nih a umnak Ulsan khua a innchung ah an vung tlaih khawh.

New Zealand palik nih mithattu nu cu an ram ah kuat ding in South Korea palik sin ah an hal hna. South Korea palik nih mithattu nu hi New Zealand ah an kuat lai le kuat lai lo fiang in theih a si rih lo.

Hnubik Thawngpang

January 10 – Camp Victoria ah nunnak a pemi CNA ralkap hna

January 10 ah Camp Victoria cu SAC ralhrang nih vanlawng in an run kah taktak i CNA ralkap nu 2 le pa 3 nih miphun luatnak rian an tuan cuahmah lio ah a kan liamtak. January 11 ah SAC ralhrang nih Camp Victoria cu a voi 2nk a kah than.

FEATURE STORY

English Version