Nihin July 18, Rakhine ramkulh, Maungdaw peng ah a cangmi Rakhine hriamtlai (AA) le SAC ralhrang kahdohnak ah AA nih SAC ralhrang 14 an nung in an tlaih hna, tiah theih a si.
Atutan kahdohnak hi AA nih lehrulchamnak hrimhrim ah an tuahmi a si. IKanhnu July 4 ah khan Kayin ramkulh chung ah a ummi AA sakhaan cu SAC ralhrang nih vanlawng pahnih in an rak kah.
Cu vanlawng kahnak ah cun AA ralkap minung 6 an nunnak a liam i, a dang ralkap tampi hliamhma an pu hna.
AA chimnak nawlngei U Khaing Thukha nih, “Nihin ah kahdohnak a chuak timi hi a dikmi a si ko. Zei ruang ah kan kah hna ti a si ahcun anmah nih vanlawng in kan sakhaan pakhat an rak kah i kan ralkap cheukhat an thi. Cu ca ah cun lehrulchamnak kan tuahmi a si,” tiah a chim.
Nihin zinglei suimilam pakua in hleikhat tiang hrawng Maungdaw peng chung hmun 3 ah AA nih SAC ralhrang pawl an kah hna hi a si.
SAC ralhrang a nung in minung 14 an tlaih hna pin ah ralhriam tampi an lakpiak khawh hna.
