Nihin November 27 zinglei (Kawlram caan) sml. 1:30 a.m. ah Argentina le Mexico an i cil ciammam i Argentina nih el awk um loin Mexico cu 2-0 in a tei ko.
An chuih caan minute 64 ah Messi nih Penalty rii lenglei in kawlbawh pa kehlei kap ah ground ball in a sut i, bawlung cu mit tthep kar ah kawl chung ah a vung i peih ko.
Cun, puai a dih lai 87 minute ah Messi nih a chanhmi bawlung cu kum 21 lawng a si rihmi Enzo Fernandez nih a orhlei kee thazaang um-ek in a vun kick ciammam i Mexico kawlbawhtu pa kehlei kawltungki in dawh tuk in a lut. Argentina nih 2-0 in Mexico cu Qatar cerhtual ah an thlim hna.
Argentina nih teinak a vun hmuhmi cu Knock Out puai (Round 16) kai nakding ah lam kau piin aa hun ong cang. Asinain, tuan ah Argentina zohchia in a teitu Saudi Arabia ca belte ah cun zaanmang chia bantuk a si ve.
Atu Group C ah a ummi Argentina hi mark 3 a ngei cang. Saudi zong mark 3, Mexico mark 1, Poland mark 4 tiin an si hna. Puai 2 ciocio an chuah cang hna i, puai 1 cio chuih an taang.
Hi hnu ah hin Poland le Argentina an i tong lai i, Mexico le Saudi an ti tong ve lai. Argentina nih Poland hi goal tlawm tein, zeiti poah in a tei zong ah Round 16 a kai colh lai. An i tluk zong ah Round 16 kai nakding ruanchannak a kau tthiamtthiam.
Poland le Argentina an i tluk a si ahcun biachattu cu Saudi a sungh le a awn hi a si lai. Saudi a sungh cun Argentina caah a ttha tuk. Khatlei khel in, Mexico nih Saudi hi tei hrimhrim aa zuam lai. Tei sawhsawh lawng si loin goal tam sut in tei a herh caah fak piin aa zuam lai. Cucaah, Saidi caah cun lam a bi ngai cang.
Saudi nih ruah lo tuk in Argentina a tei nain November 26 ah Poland he an i cil tik ah Saudi cu 2-0 in a sung diam. Poland he goal (0-0) in aa tlukmi Mexico hi Saudi nih a tei khawh lai ti cu zumh a har.
