Nihin (Kawlram caan) zinglei sml. 1:30 ah an chuihmi Argentina le Poland puai ah Argentina nih Poland cu 2-0 in an tei hna caah Argentina cu Team 16 i zuamnak “Knock Out Round” ah a kai kho cang.
Argentina le Poland an chuihmi zoh tik ah Argentina nih bawlung tinco (possession) lei in an tei ngaingai hna. Half Time hlan ah Argentina nih penalty an hmu. Asinain, Messi nih a tlolh.
Half Time hnu minute 46 ah Argentina lei in Alexis Mac Allister nih goal khat a sut. Cun minute 67 ah Julian Alvarez nih goal khat a hun sut chap.
Atu tiang Knock Out Round ah a kai cangmi hna cu: France, Brazil, Portugal, USA, England, Aurstralia, Netherland, Senegal, Argentina, Poland.
Poland hi a sung nain Saudi Arabia a teitu Mexico nakin goal khat tam deuh a ngeih caah Knock Out Round ah a kai khawh hi a si.
