ASEAN special palai a simi Indonesia ramleng vuanci Prak Sokhonn nih Myanmar ram ah rak tlawm i, SAC lutlai hna he biaruah ding in timhtuahnak a ngeihmi cu a ni lai ah a let ṭhan, tiah Cambodia ramchung thawngzamhnak Khmer Times nih a ṭial.
“A dang abiapimi tonpumhnak a ngeih caah aa letnak a si tiah ti a si nain Myanmar kong a ngiathlaitu hna nih cun SAC nih ASEAN hnatlaknak 5 a ṭuanchuah lo ruang ah a si lai tiin an zumh,” tiah Khmer Times nih a langhter.
SAC nih November 17 ah ramkhel thongtla 400 leng telh in thongtla 6,000 dengmang a thlah hna nain November 30 ah Dagon sianghleirun siangngakchia 7 thihdan a pek ṭhan hna caah atu bantuk hin ASEAN special palai nih SAC he tonnak ngei lo ding in a let ṭhan hi a si bik kho, tiah an ruahdamh.
Asinain, Indonesia cozah thawngthanhnak ah cun “Aralaimi December 14 thawk in Prak Sokhonn hi ASEAN-EU tonnak ah kai ding in timhtuahnak a ngeih caah Myanmar ram khualtlawn a letnak a si,” tiah an langhter.
“Myanmar ram a voi 3nk tlawn ding in timhtuahnak kan ngeihmi kan tlamtlinh kho ti lai lo. Hmaikum ASEAN Chairman thar tu nih tawlrel ding in rian kan chiahta. Cambodia nih Myanmar ram harnak caah kan si khawh tawk in thazaang kan chuah i, kan ṭuan ko tiin kan ruah,” tiah Cambodia ramleng pehtlaihnak zung in Secretary Luy David nih a chim.
Cambodia ramleng vuanci Prak Sakhonn hi tu kum May le June thla chung ah khan Myanmar ram ah a rak tlawng in SAC lutlai hna he tonnak voi 2 an rak ngei bal cang.
