Mon ramkulh, Bilin peng NLD Chairman U Kyaw Myo Min cu SAC ralhrang nih an tlaih hnu ah a ruak in an char, tiah theih a si.
Aluancia June 22 ah khan U Kyaw Myo Min le a dang minung pathum cu motorcycle in khual an tlawn lio ah SAC ralhrang nih meithal in an kah hna i an tlaih hna.
Meithal in an kah hnanak ah khuami pakhat cu a nunnak a liam i U Kyaw Myo Min le a hawile pahnih cu SAC ralhrang nih an kalpi hna.
July 2 ah U Kyaw Myo Min le a hawile pahnih ruak cu khuami nih burbuk lak ah an hmuh hna.
Khuami pakhat nih, “June 30 ah khan SAC ralhrang nih that hna sehlaw a dawh. A ruak hi hmun dangdang ah kan hmuh hna. Minung pahnih hi an thah hna hnu ah U Kyaw Myo Min nih an kalpi i hmun dang ah thah hna sehlaw a dawh. An thah hlan hna ah fak piin an hrem hna timi zong an ruak zohnak in theih khawh a si,” tiah BBC ah a chim.
SAC ralhrang nih Myanmar uknak an chuh hnu in NLD chungtel minung 36 tiang in thah an tong cang.
