Buanlung ah Bomb a Tlak caah Ngakchia Pahnih an Nunnak Liam

Nihin October 19, zaanlei sml. 3:00 hrawng ah Hakha peng, Senthang hmunram Buanlung khualai ah bomb a tlak caah kum 6 ngakchia pa pahnih an nunnak a liam i, a dang nu ngakchia pakhat hliamfak an pu, tiah thawngpang kan theih.

Bomb nih a tlakmi ngakchia pawl hi KG-2 catang a kaimi an si i, ngakchia an si caah hawidang sianginn an ttin hlan ah an ttintermi hna an si.

“An rak ttinnak lampi ah bomb nih a tlak hna hi a si. An zapi in kum 6 in kum 7 karlak an si hna. Pa ngakchia pakhat hi bomb nih a tlak hna hnu minute 30 hrawng ah a kan liamtak. A dang pakhat hi atu naite ah a nunnak a liam. Cun nute cu hliamhma a pu i sizung ah an kalpi,” tiah Buanlung pastor pakhat nih The Chin Journal ah a chim.

A nunnak a liammi pa ngakchia pahnih cu James Siang Za Uk le Henry Bawi Za Lian an si. Hliam a pumi ngakchia nute hi Nancy Ca Len Par a si.

Buanlung khua kiangkap ah kahdohnak zong a um lo i, ahote nih an rak kahmi bomb a si timi zong fian in an chim kho lo.

“Atu tiang ah cun ahote nih an kahmi bomb dah a si timi kan fiang kho lo. Bomb nih hin ngakchia pawl hi pe khat hlat tluk in a tlak hna,” tiah a chim chap.

Hakha peng chung MPT phone line le internet line a fum tuk caah Buanlung khualei pehtlaih a har pin ah thil sining fiang deuh in langhtertu hmanthlak zong hmuh a har rih.

Hnubik Thawngpang

January 10 – Camp Victoria ah nunnak a pemi CNA ralkap hna

January 10 ah Camp Victoria cu SAC ralhrang nih vanlawng in an run kah taktak i CNA ralkap nu 2 le pa 3 nih miphun luatnak rian an tuan cuahmah lio ah a kan liamtak. January 11 ah SAC ralhrang nih Camp Victoria cu a voi 2nk a kah than.

FEATURE STORY

English Version