Nihin January 10 zaanlei ah SAC ralhrang nih CNA Headquarters Camp Victoria cu vanlawng in an kah caah a nunnak a liammi CNA ralkap cheukhat an um, tiah thawngpang kan theih.
Zaanlei sml. 4:30 hrawng ah khan SAC ralhrang vanlawng panga nih Thantlang peng, India-Myanmar ramri ah a ummi CNA/F camp cu bomb in an kah.
Aluancia 2022 ah khan Camp Victoria hi SAC ralhrang nih vanlawng in ngiathlainak an rak tuah bal i, atu ah a voi khatnak a vun kah hi a si.
Nihin SAC ralhrang vanlawng kahnak ah CNA ralkap pa pathum le nu pahnih a nunnak a liam i, a dang minung 10 hrawng hliamhma an pu, tiah thil sining a theitu minung pakhat nih The Chin Journal ah a chim.
A nunnak a liammi, aa hliammi le rawhralnak a ummi kongkau hi The Chin Journal nih kanmah tein fehternak kan tuah kho lo. CNA/F nih caanrem an ti tikah thawngpang zong an chuah telai.
CNA/F Camp he aa naitemi Tlanglo khuami hna zong SAC ralhrang vanlawng ral tih ah hmundang ah an zaam hna, tiah thawngpang kan theih.
