Hakha khuapi ah bomb i puah sualnak in a nunnak a liammi CDF-Hakha ralkap Salai Kil Kam le Salai Daneil ruak cu nihin July 8 zaanlei ah an vui hna, tiah thawng kan theih.
Nizaan July 7, zaan sml. 9:30 hrawng ah Dawrthar sang, BEHS No. 1 sianginn pawng ah bomb puah sualnak a chuak i Salai Kil Kam le Salai Daneil cu an nunnak a liam. A dang anmah he a kal vemi CDF-Hakha ralkap pakhat cu nunhim in a um.
Hakha pastorte le khua upa hna nih SAC ralhrang sin in an ruak an vung hlam hnu ah atu bantuk hin an vui hna hi a si.
SAC nih Myanmar ram uknak an lak hnu in Chin mino tam nawn bomb i puah sualnak in an nunnak a liam cang.
Nizan nai July 5 zong ah khan Thantlang peng ralram hmun khat ah bomb puah sualnak in CDF-Thantlang ralkap Salai Bawi Za Ceu a nunnak a liam i, a dang pakhat hliam fak a pu.
