CDF-Matupi battalion (2) sakhaan pakhat cu nizaan January 15 ah SAC ralhrang thazaang tampi nih an lakpiak hna, tiah thawng kan theih.
SAC ralhrang thazaang 100 hrawng nih Hakha-Matupi lamcung i CDF-Matupi Battalion (2) hmunhma an khuarnak Ngalai khua cu an luh hnawh i an lakpiak hna hi a si.
CDF-Matupi Battalion (2) tuanvo ngeitu pakhat nih, “Zinglei sml. 9:00 hrawng in kahdohnak a chuak. SAC ralhrang 4 hrawng an thi tiah theih a si nain ralram ah a ummi hna he pehtlaihnak kan ngeih khawh rih lo caah fehter khawh a si rih lo,” tiah Kawl thawngzamhnak Ayerrawaddy Times ah a chim.
SAC ralhrang nih thazaang tam tuk in an kal hnawh hna caah CDF-Matupi nih bawmhnak pek kan herh ti zong in nizaan ah khan an thanh.
Nizaan kahdohnak ah CDF-Matupi in ralkap pakhat a nunnak a liam bang i, SAC ralhrawng lei zong in pakhat a thi, tiah an langhter.
SAC ralhrang nih CDF-Matupi meithal zun 4, motorcycle 11, phone 7, tangka ting 15 le meithal kuanfang tampi zong an lakpiak hna.
SAC ralhrang thawngzamhnak tu nih cun CDF-Matupi ralkap 2 an thi i, meithal zun 4 telh in sii-ai box khat le CDF-Matupi angki zun 50 hrawng kan lakpiak hna, tiah thawngthanhnak an tuah ve.
