Nihin February 3, zinglei sml. 6:30 ah CDF-KKG, CDF-Hakha, PDF-Kalay, RKDF le PaKaPha (ပကဖ) i bawm in Kalay peng, Kyanthar khua ah hmun a khuarmi SAC ralhrang le Pyosawhti pawl an vung kah hna.
“Kahdohnak zinglei sml. 8:00 tiang a rau i, mipi ralkap lei Sniper nih ralhrang a tlawm bik 2 a thah hna,” tiah CDF-KGG nih thawngpang an chuah.
Cu kahdohnak ah cun SAC ralhrang lei in Hantharwadi khua in miakpi in CDF/PDF pawl alang in an rak kah hna. CDF-KGG in ralkap pakhat le CDF-Hakha in ralkap pakhat hliamhma (fak lo) an pu ve.
SAC ralhrang le Pyosawhti pawl cu Kyanthar khua nitlaklei ah a ummi Aungtharyar khuate ah an lut tthan i khuami minung pahnih an tlaih hna.
“Tlaih a tongmi minung 2 cu atu tiang an thlah rih hna lo,” tiah CDF-KGG nih an langhter.
February 12, Myanmar Ramkomh Ni (Union Day) tiang khi kahdohnak a fah khawh caah Kalay-Gangaw karlak ah ahohmah khualtlawn rih lo ding zong in thawngthanhnak an tuah chap.
