Thantlang Peng, Zahnak tlang Ralpel khuami Pu Deng Thang cu innlak a lennak ah zuu ding mi hna he sikvelhnak a chuak i Pa Lalpanlian nih nam in hmun thum ah a sawh caah a nunnak a liam, tiah kan theih.
Hi kong he pehtlai in khuami pakhat nih, “Atu bantuk in thil a can hi October 20 suimilaam 9:00PM tluk ah a si. Inn lak ah a leeng i zuu a ding mi hna he an i tong. Zuu a ding mi hna he cun bia an i al. I sikvelhnak a chuah hnu Pa Lalpanlian nih atu bantuk in nam in a sawh i a nunnak a liam hi a si,” tiah The Hakha Post ah a cim.
Lai a nawngtu Pa Lalpanlian cu Zahnak Area CDF Palek nih an tlaih i phung ning tein tazacuai le bia caih dingin thonginn ah an hren tiah kan theih.
Pu Deng Thang hi, a orhlei kutbor, a hngawng le a orhlei hnuk tang ah naam hma a tuar i, a hma fah a celh lo caah suimilaam 11:00pm ah a nunnak a liam.
