Thantlang khuachung ah CDF le CNA ralkap bu fonh le SAC ralhrang karlak kahdohnak ah CDF-Thantlang in ralkap pahnih nih an nunnak an pek, tiah thawngpang kan theih.
February 14 le Febraury 17 karlak ah CDF-Thantlang ralkap Moses Van Bawi Hup le Van Tha Bik a nunnak a liam hi a si.
Moses Van Bawi Hup le Van Tha Bik nih miphun le ram caah an nunnak an peknak kong cu chungkhar hawikom naihniam hna nih Facebook ah an hmanthlak he ngaihchiatnak an tarmi hmuh khawh a si.
Asinain, CDF le CNA lei nih a nunnak a liammi Van Tha Bik le Moses Van Bawi Hup kong he pehtlai in langhtermi a um rih lo.
February 8 ah CDF le CNA nih Thantlang khua i SAC ralhrang palik sakhaan an lak hnu in CNA le CDF in minung 4 nih ram le miphun caah an nunnak an pek cang.
February 8 i Thantlang palik sakhaan laknak ah CNA ralkap Liuetenant Khup Hlei Thang, Febraury 12 ah CDF-Thantlang (Vailam Battalion) in Sang Hlun Thang le atu kan langhtermi a cunglei i, Moses Van Bawi Hup le Van Tha Bik hi an si.
February 13 ah khan Thantlang No (2) Primary School le TBC biakinn i CNA le CDF hmunkhuarnak cu SAC ralhrang nih an lak, tiah anmah SAC ralhrang dirkamhtu thawngzamhnak pawl nih an langhter.
Cu ah cun, CNA le CDF ralkap 2 an thi i meithal zun 2 le a dangdang thilri cheukhat kan lak tiah an langhter.
CNA le CDF ralkap 2 an thi an timi hi atutan i Moses Van Bawi Hup le Van Tha Bik an si le si lo theih a si lo bang in SAC ralhrang dirkamhtu hna thawngthanhmi hi adik le dik lo zong fiang in theih a si lo.
