Kalay peng ah SAC ralhrang nih an rak tlaihmi hna Chin nungak 9 lak ah nungak 4 cu hliamhma an tuar nain SAC ralhrang nih sii thlopbulnak nawl an pe hna lo, tiah Kalay khuami pakhat nih Irrawaddy thawngzamhnak ah a chim.
Sii thlopbulnak nawl an pek lomi hna minung cu: Niang Don Cin, Lal Muan Kimi, Lal Thlan Hluii, le Lal Pian Feli hi an si hna.
Lal Thlan Hluii le Lal Muan Kimi hi SAC ralhrang nih an rak tlaih hna lio ah bomb ci nih a peh hna i hliamhma an pu. An hliamhma a dam tiang in thlopbulnak nawl an pe hna lo.
Lal Pian Feli hi Kalay thonginn ah facang tun cawithlir tibantuk rianhrang an tuannak ah a tai aa hrawh. Asinain, thlopbulnak nawl an pe ve lo.
Cun, Niang Don Cin hi SAC ralhrang nih an hremnak a mitkhua ṭha tein a hmuh lo pin ah a hna zong a chet pah, tiah Irrawaddy nih a ṭial.
A cunglei Chin nungak 4 hi November 16, 2021 ah SAC ralhrang nih PDF-Kalay sakhaan pakhat an rak luh hnawh lio ah nungak 9 an rak tlaihmi hna lak ah aa telmi an si.
SAC ralhrang nih Myanmar ram uknak an chuh hnu ah PDF-Kalay ah sii-ai lei thlopbulnak rian ṭuan ding in a pum aa pemi an si hna.
