Chinram 61% kan Control Khawh tiah SAC nih Report Chuah

Chin ramkulh chung hmunram zatuak in 61% cu kan control khawh cang, tiah Chin ramkulh SAC ralhrang nih August thla chung ah an chuahmi thlithup report (Classified Report) ah an langhter.

Cu SAC report ah cun Hakha peng hmunram 60%, Thantlang peng hmunram 50%, Falam peng hmunram 60%, Tedim peng hmunram 60%, Tonzaang peng hmunram 70%, Mindat peng hmunram 55%, Kanpetlet peng hmunram 53%, Matupi peng hmunram 63% le Paletwa peng hmunram 73% kan control khawh cang, tiah an langhter.

Chin ramkulh huap in hmunram 61.44% hi kan control khawh cang, tiah an langhter.

Hakha-Gangaw lampi le Hakha-Falam lampi control khawh ding in SAC ralkap le palik i bawm in sakhaan hmun 5 ah ser ding in timhtuahnak zong an ngei.

Hakha-Gangaw lam ah Zokhua, Tinam le Lungcawi ah lam kilkawinak sakhaan ser ding in timhtuahnak an ngeih bang in Hakha-Falam lam ah Chuncung le Laiva Tidil pawng ah sakhaan ser ding zong in an timhtuah.

Chin ramkulh SAC nih Myanmar ramkomh SAC sin ah (thilthup) report a pekmi cathluan hi cahmai 65 a sau i, Chin ramkulh chung hriamtlai hna thazaang le an sakhaan umnak hmunhma tibantuk zong an langhter dih.

Cu lawng si loin Chin ramkulh chung SAC palik thazaang le checkpoint pawl an umnak hmunhma hna zong an langter hna.

Asinain, Chin ramkulh chung kap hnih kahdohnak ah a thimi/hliampumi ralkap milu le SAC ralhrang nih an tlaihmi hna milu kongkau pawl langhter a si lo.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org