CNF Thithruainak tang ah um ding in CDF-Zotung nih Biachah

CNF/CNA tthithruainak tang ah cawlcanghnak ngeih ding in CDF-Zotung Organization, Supreme Council nih biachahnak kan ngei, tiah nihin July 23 ah CDF-Zotung nih phungning in thawngthanhnak an tuah.

“Kan ralkap pawl CNA sin ah raldoh cawn ding in thlah i raldoh cawnnak tlamtling an ngeih hnu ah kanmah hmunram ah kir in rianttuan ding in CNA upa hna he hnatlaknak kan ngei,” tiah CDF-Zotung nih an langhter.

CNF cu nucan le pacan ralkap bu bantuk in bochan ding in ahramthok tein CDF-Zotung nih dirhmun kan rak ngeih cangmi zong a si, tiah an langhter chap.

CDF-Zotung nih Mirangca in an chuahmi cathanh pakhat zong ah, “CDF-Zotung cu CNA tlangtlaknak le phungphai tang ah kan um cang. CNA ah raldoh a cawngmi (CDF-Zotung) ralkap pawl cu CNA nih ralkap bu pakhat (Zotung Ralkap Bu) ah a ser hna lai i, Zotung hmunram ah hmunkhuar in SAC an do lai. Atulio SAC dohnak ah hin CNA/CNF tlangtlaknak tang ah rianttuan hi abiapi tuk,” tiah an langhter.

Hi kong he pehtlai hin fiang deuh thil sining theih awk ah The Chin Journal nih CDF-Zotung sin ah ca kan kuat nain pehtlaihnak a kan tuah kho rih lo.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org