KNU Battalion (6) hmunram ah a cawlcangmi KNLA le PDF ralkap bu fonh “Cobra Ralkap Bu” cu motor in tirawl an phorh lio ah SAC ralhrang nih an kah hna i, minung 3 an nunnak a liam tiah thawng kan theih.
Nihin November 23 zinglei ah Myawaddy le Wowlay motor lampi tirawl phor in a kalmi Cobra Ralkap Bu chungtel minung 10 cu SAC ralhrang nih hriamngam le hriamfa in an kah hna i, an motor aa let.
Cobra ralkap minung 5 an zaam kho. Asinain, motor aa lehnak ruang ah minung 3 an nunnak a liam. A dang minung pahnih hi Cobra ralkap bu chungtel dang pawl nih an rak khamh khawh hna.
A nunnak a liammi minung pathum hna cu Eh Mu (kum 28), Lu Lu Phaw (kum 22) le Kyaw Kyi (kum 20) hna hi an si. An pathum lak ah Lu Lu Phaw hi nungak a si.
Ram le miphun caah a nunnak a pemi Cobra Ralkap Bu chungtel minung 3 cu nihin ah ahmanungbik upatpeknak le ruakthlahnak an tuahpiak cang hna.
