Dr. Lian Hmung Sakhong le Gwangju Khuabawi Ton Biaruahnak an Ngei

South Korea ram ah a phanmi NUG Ramkomh Federal Vuanci Dr. Lian Hmung Sakhong le Gwangju khuabawi Mr. Kang Gi Jung cu nihin October 18, zaanlei sml. 3:10 ah ton biaruahnak an ngei, tiah South Korea ram NUG aiawhtu zung nih thawngpang an chuah.

Cu ton biaruahnak ah cun Mr Kang Gi Jung nih Myanmar ram ah a cangmi thil sining fiang tein kan theih dih, rialdip uktu ralkap uknak tang ah a ummi Myanmar rammi hna nan harsatnak zong kan in temtuarpi hna, keimah pumpak zong in NUG cozah hi kan dirkamh hna i, Korea cozah zong nih Myanmar ram Democracy cawlcanghnak hi pehzul in a dirkamh lai, tiah Dr. Lian Hmung Sakhong sin ah a chim.

Dr. Lian Hmung Sakhong zong nih 1980 ah Gwangju in aa thawkmi South Korea Democracy cawlcanghnak tuanbia hi kan theih i, kan i zohchunhmi zong a si. Myanmar Democracy cawlcanghnak kong ah South Korea nih na kan dirkamh zungzal caah South Korea cozah le mipi cung ah lunglawmhnak tampi kan ngei, tiah khuabawi Mr. Kang Gi Jung sin ah a chim.

Ton biaruahnak an ngeih dih hnu ah 1980 lio South Korea ram Democracy cawlcanghnak philhlonak lung an phunnak hmun ah vehvatnak an ngei tti hna.

Dr. Lian Hmung Sakhong hi South Korea ah zarh khat hrawng a caam rih lai i, South Korea ram cozah he aa pehtlaimi bu hna le a dangdang zatlangbu hna he tonnak a ngeih lai pin ah Myanmar rammi hna le Chinmi hna he tonnak zong a ngei te lai, tiah NUG nih thawngpang an thanh.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org