“The Dragon Leg” tiah theihmi Tial Cung Thang le Philippine pa Jeremy Pacatiw i thongh nakding nicaan a hun nai thluahmah cang.
Atutan Tial Cung Thang he aa thong dingmi pa Pacatiw i One Championship a tuanbia hi hun bih ta duak awk ah abiapi ngai ve.
Tial Cung Thang cu “The Dragon Leg” tiah minthatnak in auh a si bang in Pacatiw zong hi “The Juggernaut” tiah minthatnak in auh vemi a si. A sullam cu a “thazaang a tthawngmi/a hmual a pin ngaimi” tinak a si.
Pacatiw hi One Championship ah Tial Thang nakin hmuhtonmi tampi a ngei cangmi a si. Voi 14 tiang a rak i thong cang. Voi 10 teinak a hmu i, voi 4 a sung. Voi 10 teinak a hmuhmi lak ah Knock Out (KO) in voi 2 a tei hna.
Anih hi tleihkhih i thengh le reh nakin kuttum thongh a thiam i a kee zong a ttha. A tonghmi puai pawl zoh tik ah a sungh caan zong ah fawilebai in an tei tawn lomi hmuh khawh a si.
Thongh a thiam bang in amah he aa tthuami pawl defend deuh in an um tik ah a nor chin thluahmah tawn hna. A orhlei kee a ttha i, mi phei chuih le paw/ttang hrawng lamh a thiam ngaingai. Cun, a tha a sau fawn.
MMA Fact timi website nih Tial Cung Thang le Pacatiw an i tthuat nakding kong ruahnak a ttialmi ah cun “Tial Cung Thang hi Pacatiw nakin KO lei ah a ttha deuh. Tial Cung Thang hi KO in mi tei khawhnak 30% chance a ngei i Pacatiw tu cu 20% chance lawng a ngei,” tiah a langhter.
An kumkhua zoh tik ah Pacatiw hi Tial Cung Thang nakin a upa deuh. Asinain, Tial Cung Thang hi a tungsan 176cm a si i, Pacatiw hi 170cm a si. Tial Cung Thang a khaan a sang deuh.
Pacatiw hi puai 14 aa thong cang i thla 8 ah voi khat rate in aa thong. Tial Cung Thang hi voi 4 aa thong i, kum khat hrawng ah puai khat rate in aa thong ve. I thonghnak lei hmuhtonnak ah cun Pacatiw nih a tei ngaingai.
Atutan Tial Cung Thang le Pacatiw puai hi anmah pumpak minthatnak ca zong ah abiapi ngaingai. Atulio One Championship thongzuamnak Bantamweight Division ah hin minthang an tam ngaingai. Cu chung ah cun Top-5 tiah langsar khun in an auhmi hna zong an um.
Kevin Belingon, Bibiano Fernandes, Fabricio Andrade, Kwon Won Il le Stephen Loman hi atulio One Championship Bantamweight Division ah cungcuang bik an si hna i, Tial Cung Thang le Pacatiw pakhatkhat nih atutan puai ah el awk um loin teinak an hmuh khawh ahcun a cunglei minung 5 hna level tluk ah a phan kho ding an si.
Atulio caan te ah hin cun aho nih dah a tei lai? timi biahalnak hi leh awk ah a har ngai. Asinain, Pacatiw hi a tha a sau i, Tial Cung Thang hi ahlan aa thonghmi zoh tik ah Round 3nk hrawng ah a tha duai tawn lengmang. Cucaah, ahmater deuh Round pawl ah tei khawh/mark lak khawh biatak tein aa zuam a hau ko.
