Gangaw lam ah Khualtlawng Motor Kah a Tong, Nutung Pakhat Thi

Nihin August 12, zinglei sml. 8:00 hrawng ah Hakha-Gangaw lam ah khualtlawng motor (Pajero) meithal in kah a ton caah nutung no pakhat a nunnak a liam, tiah ruak a bultawltu Hakha biaknak lei upa hna sin in thawngpang kan theih.

“Nihin zinglei suimilam pariat hrawng ah khan hi thil hi a cang. Hakha-Gangaw lam mengtung 4 zawn hrawng khan a si. Annih hi hmai bik ah a kalmi motor an si. Meithal kah thawng an theih in an dir i an kun dih hna. Fa pakhat a ngeimi Pi Siang Hnem Cer hi meithal kuan nih a khen caah a nunnak a liam,” tiah ttuanvo ngeitu upa pakhat nih The Chin Journal ah a chim.

Pi Siang Hnem Cer (kum 22) hi fa pakhat a ngeimi nutung no a si i, Falam peng Ral-lang khuami a si. Meithal kuan nih a lu ah a khen i a hmun ah a nunnak a liam colh.

“Anih hi a lu ah meithal kuan nih a khen i a hmun ah a nunnak a liam. Cun, a dang pa pakhat Kap Tin Hre hi a phei ah an khen i a hma a fak ngai. Cun, Pi Siang Hnem Cer i a vapa Paul Lian hi a liang ah hliamhma fak lo a pu ve,” tiah a cunglei upa nih a chim chap.

Meithal puah thawng a than lecangka in khualtlawng pawl an kun dih hna i, khoika lei in a rami meithal kuan nih a khen hna timi zong an fiang kho lo.

Pi Siang Hnem Cer a rauk cu Hakha Township Christian Ministers Fellowship (HCMF) bawmhnak in Falam peng an khua lei ah an tlunpi, tiah thawngpang kan theih.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org