Germany ram uknak lak ding in timhtuahnak an ngei tiah lunghrinhmi minung 25 cu nihin December 7 ah German palik nih an tlaih hna, tiah Reuters thawngzamhnak nih a ṭial.
German palik thazaang 3,000 hrawng nih Germany ramchung State 13 chung i hmunhma 130 ah luhnawhnak an tuah i, atu bantuk in minung 25 an tlaih hna hi a si.
An tlaihmi hna hi Reichsbürger (Reich citizens) phu tiah theihmi chungtel an si i, 1949 hnu ah an dirhmi atulio Germany rampi sining hi a cohlang duhlomi bu an si.
Hitler nih a hruaimi Nazi cozah a tlak hnu ah an dirhmi chanthar Germany ram hi phungning lo a si, tiah hi bu nih hin an kalpi. Vawleicung Ralpi pahnihnak a dih hnu ah Nitlaklei ram (Allied Forces) he remdaihnak minsen kan thutmi zong a um lo, tiah a aupitu an si.
Germnay ram ah Nazi uknak nunter ṭhan ding in aa zuammi bu (Far-Right) tete an um len hna i, atutan tlaih a tongmi bu Reichsbürger zong hi cu bantuk bu cu a si.
A cunglei minung pawl tlaih ding in nawl a onhtu German biaceihnak zung nih, “Hi hna pawl nih hin German Parliament ah meithal he luh hnawh ding in timhtuahnak an ngei,” tiah an chim.
Tlaihmi minung 25 chung ah 22 hi German miphun an si i, a dang minung 3 chung ah pakhat hi Russia rammi a si. A dang ramdangmi pahnih belte hi an ram an langhter rih lo.
Hi kong ah hin Russia sawhkalhnak aa tel maw timi biahalnak kong he pehtlai in Russia cozah biachimtu Dmitry Peskov nih, “Hi kong ah Russia kan i tel nakding a sullam a um lo. Hihi cu anmah German ramchung buaibainak deuh si dawh a si ko,” tiah a chim.
