February 27 in March 7 karlak ah Hakha-Falam kar ah CNA, CDF, CNDF le SAC ralhrang karlak kahdohnak voi 18 a chuak i ralhrang 80 leng an thi, tiah CNF nih thawng a chuah.
Cu kahdohnak ah cun CNA in ralkap pathum le CNDF in ralkap pakhat nih ram le miphun ca ah an nunnak an pek.
Cun, Rihkhawdar lei kahdohnak zong ah ralhrang 8 an thi i, miphun ralkap lei in hliampu/mithi an um lo, tiah an langhter.
Falam lei in a rak i thawhmi SAC ralhrang Tank pahnih telh in motor 25 hrawng cu nihin March 6 zaanlei ah Hakha khuachung ah an lut.
February 27 in Falam in an rak i thawh i CNA, CDF le CNDF nih pehzul in an kah hna caah lampi ah zarh khat an rau.
An ratnak lampi ah Dokthek khua inn 16 an khangh ta. Chuncung khua inn tampi an bauh i thilri an fir pin ah khuami Pu Rung Hu (48) zong meithal kuan 5 in an kah i an thah.
Hakha-Falam kar kahdohnak ah hliamhma a pumi SAC ralhrang 18 zong Hakha sizung ah an thlop lio hna, tiah thawngpang kan theih.
