Hakha, July 8 – Nihin July 8 ah Hakha le Falam karlak Thlanrawn khua pawng ah Chin miphun ralkap hna le SAC ralhrang karlak i kahdohnak a chuak i SAC ralhrang lei in minung 15 hrawng an thi cang, tiah thawng kan theih.
Kalaymyo in a rak kaimi SAC ralhrang motor 20 leng cu nizaan ah Falam peng Lungpi khua ah an rak i nihin ah Hakha lei ah an ra.
Chin miphun ralkap CNA, CDF le CNDF i bawm in Thlanrawn khua pawng ah nihin ah an kah hna hi a si.
SAC ralhrang a thimi ruak pawl motor cung ah an khin cuahmahmi hna cu miphun ralkap pawl nih a lang in an hmuh hna.
Nihin zaanlei sml. 4:00 tiang ah miphun ralkap lei in hliam a pumi le a nunnak a liammi an um lo. Atu ca kan ttial lio caan ah hin kahdohnak a dai cang.
Atutan an kahmi hna SAC ralhrang pawl hi June thla thih lei ah Kalaymyo in Laitlang ah a rak kaimi an si i, Falam peng chung ah a taitang a thimi pa pakhat le a hnachetmi nu upa pakhat an thah hna.
