Nihin November 9 thawk in Hakha khuachung sang cheukhat ah Electric mei a pek khawh cang, tiah khuami hna sin in thawngpang kan theih.
Tu zaan sml. 7:00 hrawng in khan Dawrhlun sang le Khuathar sang telh in sang cheukhat ah mei a ra i, a dang sang cheukhat mei a rat rih lonak zong an um len ve.
Aluancia October 21 thawk khan Hakha-Gangaw lam, Nipi khua pawng ah Electric tung a kiak i, November 4 in remh an thawk hnu ah mei an hun pek khawh tthan hi a si.
Zarh thum chung hrawng mei rat loin a ummi Hakha khuachung ah harnak tete an hun tong ngaingai hna.
Meihol man a kai, phone battery rawnnak a har i meiseh a ngeimi hna inn ah rawn sio a si pin ah wifi zong a thih caah a man a fakmi Mobile Data cu duh zong duh lo zong ah hman cio a si.
