Hakha peng, Tilak khua ah SAC ralhrang pawl an phanh caah khuami an zapi ngawt in khuadang ah an zaam hna, tiah a zaam vemi Tilak khua upa pakhat nih The Chin Journal ah a chim.
“Cacawn ninga ni (July 22) ah khan kan khua ah an rak phan. Zarhte ni ah kan khua in an chuak i, a thaizing Zarhpi ni ah an rak kir tthan. Zarhpi ni i kan khua an rak phanh tthan ah cun khuachung hmun kip ah hmunhma an la, meithal zong a kan puah hnawh len caah khua ah kan um ngam ti hna lo. Khuami thilri an lakmi a um len pin ah innzuat sattil an duhduh in an i thah. Atu hi cu kan khuami zatuak in 90% hi cu kan zaam dih cang hna,” tiah a chim.
SAC ralhrang pawl Tilak khua an phanh lecangka in miphun ralkap pawl an i ton tawnnak inn pakhat an luh hnawh colh caah Tilak khua ah ralhrang thawngpetu an um kho tiah an ruahdamh.
Nihin July 28 zinglei tiang ah cun i kahdohnak a um lo bang in tlaihkhih a tongmi zong an um lo.
Tilak khua cu Gangaw peng Daidin (Shungshi) khua he meng 10 a hlatnak ah a ummi a si i, khuami a tam u cu Daidin ah an zaam hna.
Daidin ah a phanmi sayama pakhat nih, “Nizan le nihin zing tiang minung kan i rel ning ah cun Daidin ah hin minung 300 hrawng kan phan lai. Cun khua dangdang ah a pikpak in a zaammi an um ve hna,” tiah a chim.
Tilak khua ah inn 120 hrawng a um i milu hi 500 in 600 karlak an si.
Tilak in Laitlang lei kap ah a ummi Keizuan khuami hna zong ralhrang an rak phak sual ah tiin thinphang in an um hna.
Keizuan khua upa pakhat nih, “Atu tiang hin cun kan khua ah an rak phan rih lo. Laitlang lei an rak kai ahcun kan khua hi an pal khawhmi a si. Zaam ding in kan i tim ve ko hna,” tiah a chim.
Tilak ah a phanmi SAC ralhrang pawl hi khoika lei ah an kal timi khuami nih an thei kho lo.
Gangaw pawng khuate ah a ummi minung pakhat nih, “July 18 ah khan Tilak lei ah ralkap pawl cu kal an i thawh. Mah ni thawk khan Gangaw peng chung phone thah hram an thawk. Ralkap hi 100 hrawng an si. Tilak khua in an chuak cang an ti nain nihin (July 28) zinglei tiang ah cun Gangaw lei ah an rak kirmi kan hmu hna lo,” tiah a chim.
