Hakha khua, Chin Oo Si sang ah a ummi Suhpawng zung cu nihin zinglei sml. 2:00 hrawng ah a kaang i, Suhpawng zung innpi chung ah a ummi Hakha penguk zung le Sipin zung an kaang, tiah thawngpang kan theih.
Hi Suhpawng zung ah hin Sipin, Penguk, La Wa Ka, Kye-Latt tibantuk zung pawl hmun khat ah an tthut ttinak a si i, SAC ralhrang nih uknak an lak hnu ah ralkap le palik nih pit ngaiin an conghmi a si.
Khuami pakhat nih, “Nihin zinglei suimilam pakhat le pahnih karlak hrawng ah khan meithal kah thawng le bomb puah thawng a thang len. Cu hnu ah cun Suhpawng zung cu a kaang,” tiah The Chin Journal ah a chim.
Suhpawng zung rianttuantu hna he naihniammi a simi khuami pakhat nih, “Suhpawng zung chung i Penguk zung le Sipin zung an kaang. A chunglei deuh ah a ummi La Wa Ka zung tibantuk cu mei nih a tlai rua lo,” tiah a chim.
Suhpawng zung kahdohnak ah a thimi le hliammi an um le um lo fiang in theih a si rih lo pin ah zung chung thilri an sunghmi zat zong fian a si rih lo.
