Nihin August 10 zinglei ah Mizoram, Serchhip ah Hakha le Thantlang mi pahnih cu bomb sernak thilri pawl he an tlaih hna, tiah Mizoram palik nih thawngpang an chuah.
Aizawl khua in a chuakmi motor pakhat cu Serchhip palik nih Sailiamkawm timi Checkpoint ah an check hna i atu bantuk in tlaih an ton hi a si.
Motor cung ah bomb sernak thilri he aa pehtlaimi Gelatine Neo Gel 7,800, Detonator 4,063 le Fuse 700 an hmuh.
Motor a mongtu Sanglianthanga telh in Hakha le Thantlang mi Pa Sui le Van Cung Nung zong palik nih an tlaih chih hna.
Kan Chinram ah ral pehzul in a um bang in raldohnak ca ah phorhmi ralhriam lei thilri tampi Mizoram ah tlaih an tong cang.
