By Van Bawi Lian | Hakha khuachung Zarhpi zing pumh le Chiat-ṭhat ni caan ah rikhiah in SAC ralhrang nih nawl onhnak an pek ṭhan hna, tiah thawngpang kan theih.
SAC ralhrang nih February 4 ah Myanmar ramchung peng/myone 37 ah Martial Law an chauh i, Chin ramkulh zong peng 8 an i tel.
Zaanlei sml. 6:00 in zinglei sml. 6:00 tiang ahohmanh lengchuah lo ding le minung 5 cung pumhkhawmhnak tuah lo ding timi order chuah a si.
Hi kong he pehtlai hin Hakha Christian Minister’s Fellowship (HCMF) nih SAC ralhrang pawl an ton hna i Zarhte Ni hlacawn, Zarhpi Ni pumh le Chiat-ṭhat Ni i bultawl ning kong ah SAC ralhrang nih phundang in an hun onh ṭhan hna hi a si.
Zarhte Ni i Choir le a dangdang hlacawn cu zinglei sml. 11:00 in zaanlei sml. 4:00 tiang onh a si. Zarhpi Ni pumhkhawmh cu zinglei sml. 7:00 in zaanlei sml. 4:00 tiang onh a si.
Khirhfabu chung meeting, ṭhitumnak, cawnpiaknak le a dangdang tonpumhnak pawl cu ni 5 hlan ah ahlanken te in penguk zung (General Administration Department-GAD) ah nawl onhnak hal hmasa a hau.
Mahle inn ah ṭhitumhnak, thlacamnak le thihlohnak tibantuk a um tik ah mahle Khrihfabu cio nih nawl halpiak ding in ti a si. Thihloh ton tik ah a rannak in ruak fimnak nawl hal ding ti a si.
Cun, lengchuah a ngah lo caan zaan ah lakhruak thil a cangmi (Tck., sizung kal hauh) tibantuk a um ahcun GAD zung ah pehtlaihnak tuah ding a si. Hi kong ah HCMF upa hna sin ah phone chawnh i bawmh hal khawh a si ko lai, tiah HCMF nih an langhter.
