Nihin August 30, zinglei sml. 9:00 hrawng ah Hakhathar inn pakhat cung ah SAC ralhrang bomb a tlak caah nu pathum le pa pakhat hliamhma an pu hna, tiah thawngpang kan theih.
Zinglei rawl an ei lio ah bomb nih a tlak hna hi a si i, an zapi in Hakha sizung ah an chiah hna.
Khuami pakhat nih, “Zinglei rawl an ei lio ah bomb nih an inn a tlak. Hliamhma a pumi hi nu pathum le pa pakhat an si. An hliamhma a fak tuk lo. Nihin zaanlei zong ah sizung in an chuak kho men,” tiah The Chin Journal ah a chim.
Nihin zinglei sml. 6:00 hrawng in Hakhathar ah SAC ralhrang le miphun ralkap bu fonh karlak ah kahdohnak suimilam pahnih fai hrawng a chuak i SAC ralhrang nih an kahmi bomb nih inn a tlak hi a si.
