SAC ralhrang nih Hakhathar, Nahau tlang in Hniarlawnthar lei ah bomb in an kah caah Baptist pastorpa inn telh in inn 2 an kangh pin ah nutung pakhat zong an hliamh, tiah thawng kan theih.
“Nihin zinglei sml. 10:00 hrawng ah khan Nahau tlang in Hniarlawnthar lei ah an kah. Khuachung ah bomb an tla. Baptist pastorpa inn le a pawng inn pakhat an ciam dih. Nutung pakhat zong a liang ah hliam fak a pu,” tiah minung pakhat nih The Chin Journal ah a chim.
Chuncung lei in a rak rami SAC ralhrang pawl cu Hakha lei in SAC ralhrang nih motor in an don hna i, lampi ah CDF/CNA he kahdohnak pehzul in a chuak.
SAC ralhrang pawl hi Hakha khua ah an lut deng cang. Hakhathar, 6-Lamton an phan deng cang.
Nihin zinglei SAC ralhrang nih an kahmi bomb hi Hniarlawnthar khuahriang ah voi 4 an tla i khua laicer ah voi khat a tla.
