Nihin December 15 zaan ah Myanmar ramhcung hmun kip le Mizoram chung ah an hmuhmi ceu cu India nih a hneksakmi “Intercontinental Ballistic Missile” (ICBM) ruang ah a si kho, tiah an ruahdamh.
Atu zaanlei sml. 5:30 ah khan India ram Odisha in India nih Agni-5 tiah min an pekmi ICBC hneksaknak cu tlamtling ngaiin an tuah khawh.
Hi Agni-5 missile hi meng 3,100 leng phan in a zuang khomi a si. ANi thawngzamhnak nih, “Nihin ah India nih Agni-5 ballistic missle cu tlamtling tein a hneksak khawh,” tiah a tial.
Agni-5 missile hi lamhlatpi a kah khawh pin ah Nuclear Bomb tarh khawhmi zong a si. Atu bantuk in rocket an kah tik ah Kawlram kan hmuhmi ceu bantuk hi a chuak tawn tiah thiamsang pawl nih an chim.
US le Tuluk nih an kahmi Rocket ruang ah a si kho tiah online ah an tar lenmi zong hmuh khawh a si. Asinain, US nih an kahmi cu si dawh a si lo.
Aruang cu US/NASA nih thlah a timhmi SPACEX FALCON 9 Rocket cu December 16 tu ah thlah ding in nicaan an thawn. An thlah rih lo.
Cun, nizaan December 14, zinglei sml. 3:33 ah khan Tuluk nih Zhuque-2 timi Rocket a thlah i, Vancung sangpi a phak hnu ah a rawk. Atu tiang khoika a phak timi an thei lo. Tuluk cozah zong nih fiang in thawng a langhter lo. Mah Tuluk thlahmi Zhuque-2 rocket hi Methane tihaang hmang in a zuangmi rocket a si.
