Nihin October 19, zinglei sml. 9:30 hrawng ah Yangon ramthen Insein thonginn bomb puahnak ah minung 8 an nunnak a liam, tiah theih a si.
Bomb hi voi 2 a puak. A puahnak hmun hi thlongtla pawl caah an chungkharle nih cakuat le sii an kuatmi hna an apnak counter a si. Bomb a puah hnu ah palik nih meithal kahthlorh in an kah caah mipi a thimi an um len.
Bomb puahnak ngaingai ah a thimi hi thonginn congtu palik pathum an si. Thongcong palik dang pawl nih meithal an kahthlorh ruang ah thonginn rawl a rak chanmi nu 5 an nunnak a liam chap.
Thil sining a hmutu minung pakhat nih, “A puahnak hmun hi cakuat le sii an apnak counter ah a si. Counter phen ah a rian a ttuanmi palik pathum an umnak zawn in a puak. Anmah counter chung in a puakmi a si. An pathum ning in an thi. Cu bomb a puah dih cun thonginn palik pawl nih mipi lei ah meithal an kah. Cu ruang ah cun mipi an thihnak a si,” tiah Khit Thit Media ah a chim.
A dang minung pakhat nih, “Bomb a puah lecangka in uico pawl nih meithal an kah ruang ah minung pakhat a tlukmi ka hmuh. Thonginn ah luh ti loin kannih cu kan kir,” tiah a chim.
Bomb puahnak le meithal kahnak ruang ah hliamhma a pumi minung 18 zong an um, tiah RFA nih a ttial.
Rialdip uktu SAC lei nih cun Insein Thonginn ah parcel bomb a puah ruang ah minung 8 an thi, tiah ningcang loin thawngpang an chuah.
