World Cup ah Iran an sunghmi motor horn tum in a lawmtu kum 27 pa Mehran Samak cu Iran palik nih meithal in an kah caah a nunnak a liam, tiah The Guardian thawngzamhnak nih a ṭial.
November 30 ah Iran le US an i tong i, US nih 1-0 in an tei hna. US nih Iran an tei hna lecangka in Iran ramchung khuapi tampi ah mipi lamcung ah an chuak i, Iran an sunghmi cung ah lawmhnak bongbong le chengcheng an tum hna.
Zei ruang ah dah Iran an sung nain anmah rammi lila an i lawmh? timi biahalnak kong he pehtlai in US ram ah a ummi Iran rammi Journalist Masih Alinejad nih hitihin a chim:
“Iran hi bawlungchuih a uar ngaimi ram an si. Asinain, atu ah lamcung ah an chuak hna i, Iran Team an sunghmi cung ah lawmhnak an langhter. Aruang cu mithat lainawng Iran cozah nih mipi hnemhnak caah Sport (Zaanglentecelhnak) a hman lai timi an duh lo caah a si,” tiah a chim.
Aluancia September thla ah khan Muslim nu puanlukhuh i khuh lo ruang ah Iran nuncanziaza kilkawitu palik nih kum 22 a simi nungak Masah Amini timi nute an rak tlaih i, fak tuk in an hremnak ah September 16 ah a nunnak a rak liam.
Masah thihnak nih Iran ram khuapi kip ah rialdip uktu Iran cozah ralchanh lamzawhnak fak piin a chuahter. Nihin tiang ah Iran palik nih lamzawhtu 448 thi lak in an kah cang hna, tiah The Guardian nih a langhter. Atu tiang Iran ramchung ah acozah duhlo lamzawhnak a dai rih lo.
Cucaah, US nih World Cup ah Iran an tei hna nain Iran rammi pawl ngaihchiat loin an i lawmhnak hi a si.
United Against Nuclear Iran timi bu ah Director a ṭuan liomi Jason Broadsky nih, “Iran an sungh ruang ah Iran mipi lamcung ah an chuak i lawmhnak an langhter. “Zalennak kan duh” (Freedom) ti zong in an au hna. Rialdip uktu Iran cozah caah ningzak ngaingai a si,” tiah a Twitter cahmai ah a ṭial.
