Shan ramkulh nichaklei ah a ummi Lohkaing khuapi ah kahdohnak a chuak lai timi thawngpang ruang ah khuami tampi nih khua an chuahtak, tiah theih a si.
Lohkaing khua hi Kokang miphun hriamtlai MNDAA le SAC ralhrang pawl an umnak a si i, ahlan zong ah hi khuachung ah hin kahdohnak fak a rak chuak tawn.
“SAC ralkap le MNDAA karlak ah theihthiam lonak a um. Kap hnih hnatlaknak atu tiang an ngei kho lo. Tuluk lei nih kahdohnak chuahpi lo ding in bia an ruah hna. Ral a thawh taktak lai le thawh taktak lai lo kan fiang cio lo,” tiah Lohkaing khua i SAC palik zung ah rian a ṭuanmi palik pakhat nih MPA ah a chim.
December 4 zaanlei thawk khan Lohkaing khuachung ah kahdohnak a chuak lai timi thawngpang a len hi a si.
Motor mongtu pakhat nih, “Nizaan ah khan minung a zaza nih khua an chuahtak. Nihin cu a thongthong bak nih an chuak. Kei zong ka motor in voi 5 ka phorh hna,” tiah a chim.
Lohkaing khuachung i KTV, Hlawhhlang Inn le Lawngkasa hmunhma vialte zong nicaan rikhiah um loin an khar hna.
Aluancia November 28 le 29 ah khan MNDAA hmunram Chinshwehaw le Nanphalone ah SAC ralhrang le MNDAA karlak kahdohnak fak ngaiin a rak chuak.
