Kalaymyo khua i SAC kuttang ah a ummi Myanmar Economic Bank ah Manager rian a ṭuan liomi U Tun Tun naing cu KTV ah hla a sak lio ah hriamtlai bu khat nih an tlaih, tiah theih a si.
U Tun Tun Naing hi December 10 zaan ah tliah a ton hi a si. Thil sining a theitu khuami pakhat nih, “KTV ah an tliah hna. A dang an zaam kho i, U Tun Tun Naing telh in minung 2 tlaih an tong,” tiah a chim.
U Tun Tun Naing tlaihkhih a ton hnu in a Facebook Account ah Dohthlennak he aa pehtlaimi ca pawl pehzul in aa tar len. [A tanglei screenshot hmanthlak zoh te].
“Thisen leiba kong ah ceihmai a herh lo…” “Ma Ee Lo…Min Aung Hlaing…” “Dohthlennak kan tei lai…” “A Me Suh dam tein um hram seh…” tibantuk catar pawl hi U Tun Tun Naing i a Facebook Account cun pehzul in aa tar thluahmah.
“A tlaitu hna nih a Facebook an hmanpiakmi a si lai. Min Aung Hlaing zong an volhpamh len. Kalaymyo khua ah cun a poh ngai mah hi. Nichuak phunkhat in an ruah hna,” tiah khuami pakhat nih a chim chap.
Atu tiang ah U Tun Tun Naing hi ahote hriamtlai nih dah an tlaih timi theih a si lo bang in Kalay hrawnghrang hriamtlai hna zong nih cu kong he pehtlai cun thawngpang an chuahmi a um lo.
