Nihin February 10, zinglei sml. 6:30 in aa thawkmi Kalay peng, Ciantha khua kahdohnak ah CDF-Hakha in Salai Ceu Chin Lian a nunnak a liam i, SAC ralhrang 15 hrawng an thi, tiah PDF-Kalay nih thawngpang an chuah.
CDF-Hakha, CDF-KGG, RKDF, PDF-Kalay le PaKaPha i bawm in Ciantha khua ah a ummi SAC ralhrang le Pyosawhti pawl an vung kah hna i kap hnih kahdohnak suimilam 3 chung a rau.
Cu kahdohnak ah CDF-Hakha in mino pakhat nih ram le miphun ca ah a nunnak a pek i SAC le Pyosawhti ralhrang lei in minung 15 hrawng an thih pin ah minung tampi an i hliam.
Kahdohnak suimilam pathum chung a rauh hnu ah SAC ralhrang nih Hantharwaddy khua lei in motor pathum thazaang an rak chap caah mipi ralkap pawl an kir tthan.
