Kalay Thonginn ah SAC Ralhrang nih an Kahmi CNDF Ralkap “Shalom”

Kalay thonginn in minung 7 zaam an timh caah meithal in an kah hna, tiah kah a tongmi hna tuksum hmanthlak pawl he SAC nih March 15 ah thawngpang an chuah.

Meithal in kah a tongmi minung 7 lak ah Falam khuami Salai Shalom Siang Thang Lian@Van Dam (kum 28) zong aa tel ve.

Shalom hi SAC ralhrang nih uknak an chuh thawk in Falam khua lamzawhnak ah hruaitu lei ah aa telmi bochan awktlak mino a si.

Hriamtlaih in SAC ralhrang doh a si hnu in CNDF ah a pum aa pemi zong a si.

CNDF nih, “Chin National Defense Force (CNDF) ralkap, paralṭha Salai Shalom Siang Thang Lian@Van Dam (kum 28) cu March 15, 2022 ni ah a biakammi bang in ram le miphun ca ah a nunnak a pek,” tiah thawngpang an chuah.

SAC thawngpang chuahmi ah, “Van Dam nih a hruaimi thongtla minung 50 hrawng nih thongcong palik 3 an tlaih hna i zaam an timh caah an kah hna,” tiah an ttial nain cucu ahmaanlomi a si, tiah Khit Thit Media nih a langhter.

“Thongcongtu palik le thongtla karlak ah i rem lonak a um ruang ah an kahmi hna a si. Kah a tongmi pawl hi PDF ralkap lawngte an si hna. Micheukhat cu an lu ah an kah hna. SAC thawngthanhmi hi lih a si,” tiah Khit Thit Media nih a ttial.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org