Kawl Ralkap Tthing MDF Hruaitu nih CDF-Mara Ralkap a Kah

Kawl ralkap a rak ttuan balmi Maraland Defense Force (MDF) ralkap haotu Pu Chhipa (Thomas Chozah) nih CDF-Mara ralkap Salai Ma Hnei (25) cu March 25 zaan sml. 9:00 hrawng ah Ngaphaite khua ah meithal in a kah i a nunnak a liam, tiah Ngaphaite khua upa nih The Chin Journal ah a chim.

“Meithal in a kaptu pa hi Kawl ralkap a rak ttuan tthingmi a si i atu MDF ah ralkap lei haotu a simi Pu Chhipa a si. Kawl ralkap a rak ttuan lio ah bomb nih a kee ah a puah hnawh i pension in aa dinmi a si,” tiah a chim.

Pu Chhipa nih CDF- Mara ralkap haotu pakhat zong a phei ah a kah ve caah hliamhma a pu.

“Kan khua ah a rak phanmi MDF ralkap hi minung 9 an si. Hriamtlai cio kan si tik ah kan khua an rat ahcun thawng na kan thanh ta hmasa awk a si kan ti hna. Cu dih cun an hruaitu Pu Chhipa nih kan khuabawi inn ah meithal a kan puah hnawh len,” tiah a cunglei upa nih a chim.

March 25 zaan ah khua sianginn ah khuami, MDF le CDF-Mara biaruahnak an ngei hna i biaruahnak a dih hnu ah hi thil a can hi a si.

“Tha tein biaruahnak ngeih ding kan ti caah kanmah CDF-Mara lei cu meithal zong an i ken lo. Biaruahnak zong an tuah dih cang ko. MDF haotu Pu Chhipa hi tlaih i ttha tein chimhrin biaruah ding an ti. A meithal chuh an timh ah CDF-Mara haotu pa cu Pu Chhipa nih a phei ah a kah. Cun, Salai Ma Hnei nih a zuan hnawh i a kah ve. Salai Ma Hnei cu a nunnak a liam. Cu dih cun meithal voi 60 hrawng a kan puah hnawh i an zaam,” tiah thil sining a chim.

A nunnak a liammi Salai Ma Hnei cu nihin March 26 zaanlei sml. 4:00 hrawng ah an vui.

Pu Chhipa (Kehlei), Salai Ma Hnei (Orhlei)

Hi kong he pehtlai hin CDF-Mara nih CNF sin zong ah thawng an thanh hna i, CNF lei zong nih thil sining ttha tein kan hlathlai lai an ti, tiah a cunglei upa nih a chim chap.

“Atulio thil sining cun MDF le CDF-Mara cu dirhmun aa ralkah tuk tik ah biaruahnak ngeih zong a har ngaingai cang lai. Hi thil a can hnu ah MDF upate lei zong in CDF-Mara sin ah pehtlaih i chawnhbiak le ngaihthiam halnak zong a um rih lo,” tiah a chim.

MDF hi atulio ah thazang 60 hrawng an si lai tiah an zumh i AA sin ah raldoh a cawngmi an si.

SAC ralhrang nih Myanmar uknak an chuh hnu in zapi theih in a langmi hriamtlai an si nain SAC ralhrang doh an tim lo, Mararam kong tu ah cawlcangh aa timmi an si, tiah MDF kong a theitu hna nih The Chin Journal ah an chim.

Mizoram, Saiha khua ah hram a bunhmi “Mara Administrative Territorial Council” (Mara Hmunram Uknak lei Council) le MDF hi pehtlai in rian an ttuan, tiah Mara upa pakhat nih a chim.

Support The Chin Journal

The Chin Journal (TCJ) is a small but passionate local news agency with limited income. Over the years, TCJ has played a crucial role in being the voice of the Chin people. We have strived to bring attention to the stories of Chin ethnic minority in Myanmar. However, like many small businesses, we have faced our share of financial struggles. The COVID-19 pandemic and the Myanmar miliatry coup in 2021 have severely impacted our revenue streams, making it difficult for us to continue our vital work without your support. This is why we are seeking donations to keep our news agency operational and continue providing reliable information to our readers. Any amount you can spare will be immensely valuable to us. To donate, click "Donate" button below. It will redirect you to the Donation Page. Thank you for your generosity!