Chin-Magwe ramri, Matupi peng chung ah khuami pawl chanhchuah ding in a kalmi CDF-Zotung ralkap pathum cu SAC ralhrang nih an tlaih hna hnu ah an thah hna, tiah CDF-Zotung sin in thawngpang kan theih.
Anmah CDF-Zotung zong nih August 3 ah cathanh an chuah i, “CDF-Zotung ralkap pathum SAC ralhrang nih an tlaih hna i an thah hna hnu ah an ruak mei in an khangh hna,” tiah an langhter.
CDF-Zotung ttuanvo ngeitu pakhat nih, “July 22 zaan ah khan tlaih an tong. Ramcci (Ramsi) khua lei ah SAC ralhrang an rat caah khuami pawl tthialkam ding in an vung kal. Rauhlo piin lolam lei in SAC ralhrang an rak chuak i an tlaih hna,” tiah a chim.
Zotung holh in Ramcci, Kawlholh in Ramsi tiah an auhmi khua hi, Magwe ramtthen le Chin ramkulh aa tonnak hmun, Matupi peng (Zotung hmunram) chung i ramri khuate a si.
Ramcci khua pawng ramlak ah miruak pathum mei in an khanghmi an hmuh hna i cucu tlaih a tongmi CDF-Zotung ralkap an si ko, tiah CDF-Zotung ttuanvo ngeitu nih a chim chap.
“Mah miruak hi tlaih a tongmi kanmah ralkap an si ko tiah kan fehter khawhnak aruang cu: SAC ralhrang nih khuami an tlaihmi hna lak ah a tlaumi hi anmah pathum lawng an si; tlaihmi minung 3 kan thah hna i mei in kan khangh hna tiah SAC ralbawi nih khuami pawl a chimh hna; cun, khuami pawl biakinn chung ah an hren hna lio ah ruak an khanghmi meiceu cu a lang in an hmuh,” tiah a chim.
Thah a tongmi CDF-Zotung ralkap pathum hna cu CDF-Zotung ralbawi Salai Tha Ceu (kum 40), ralkap Salai Aung Min Thang (kum 20) le Salai Thang Cin Mang (kum 20) hna hi an si.
Chin le Magwe ramri hrawng ah a ummi miphun hriamtlai le PDF pawl doh awk ah SAC ralhrang nih ralkap bu thum hrawng an thlah hna i Chin-Magwe ramri ah atu le atu an i chok, tiah Gangaw peng ah a ummi khuami pakhat nih The Chin Journal ah a chim.
Zotung hmunram zong ah SAC ralhrang pawl a voi 2nk an run luh caah khuate pali in khuami 1,200 leng himnak hmun ah an zaam hna, tiah thawng kan theih.
