Atulio Myanmar ramchung buaibainak kong he pehtlai in UN Security Council (UNSC) nih December 21 ah biachahnak a tuah khawh.
UNSC nih ahlan ah Myanmar ram kong he pehtlai in biachahnak voi khat a rak tual bal. 1984 ah Myanmar (Burma) cu UN chungtel si ding in biachahnak an rak tuah.
Myanmar ramchung ah ralkap nih uknak chuhnak le nuhrin covo buarnak a phunphun an rak tuah nain 1984 hnu in UNSC nih Myanmar kong he pehtlai in biachahnak a rak tuah bal ti lo. Cathanh (Statement) lawng a rak chuah khawh tawn.
Atutan hi kum hrabu pasarih leng hnu ah UNSC nih Myanmar kong he pehtlai in biachahnak a voi khatnak bik a chuahpi a si. Asinain, atutan UNSC Resolution kong ah vawleicung nuhrin covo zatlangbu hna an lung a tling lo ngaingai.
“Daw Aung San Suh Kyi le President U Win Myint telh in ramkhel thongtla vialte thlah dih ding. SAC nih Myanmar rammipi cung ah an buarmi thahnawnnak, hremnak, tlaihkhihnak tibantuk vialte ngol dih ding,” timi hi atutan UNSC Resolution ah aa telmi cu an si.
UK cozah nih Resolution ahran a suaimi ah hin Myanmar ralkap sin ah ralhriam zuarhnak vialte ngol dih ding timi a rak i tel.
Asinain, biachahnak taktak an chuahpi tik ah “Myanmar ralkap sin ralhraim zuar lo ding,” timi catlang aa tel ti lo.
Burma Campaign UK director Mark Farmaner nih cun, “Hi UNSC biachahnak hi atak ah hmual a ngei lai lo. SAC sin ah ralhriam zuarh lo ding timi hi abiapi bik ah an chiah dingmi a si. Asinain, atu an biachahnak ah ralhriam phihkhamhnak kong pakhat hmanh aa tel lo,” tiah lungtlin lonak an langhter.
Atutan Myanmar kong UNSC biachahnak ah Tuluk, Russia le India nih vote thlak loin an um (abstained). Cucaah, UNSC nih Myanmar kong biachahnak a tuah khawh hi a si.
UN ah Myanmar (NUG) aiawhtu palai U Kyaw Moe Tun nih, “Atutan biachahnak hi kar khat hmai kan nornak a si ko. Myanmar ram ah ralkap uknak le ralkap nih an tuahmi sualnak pawl dihdonghter ding in UNSC nih hi nakin hin fak deuh in le hmual ngei deuh in kan ṭuanpiak seh ti kan duh ko,” tiah a chim.
