Lungcawi Khuami Pa Pahnih Pyosawhti nih an Thah Hna

Hakha peng, Lungcawi khuami Pu Zaw Ni (kum 47) le Pu Bawi Kham (kum 64) cu Gangaw peng ah SAC ralhrang hnuzul Pyosawhti phu nih an tlaih hna i an thah hna, tiah Lungcawi pastor nih The Chin Journal ah a chim.

Pu Zaw Ni le Pu Bawi Kham hi October 3 zinglei sml. 9:00 hrawng ah khan Gangaw peng ar phiar ding in motorcycle pahnih in an kal.

“Arbawm pawl i phorh i motorcycle pahnih in Gangaw-Kalay ramri khua pawl ah ar phiar ding in an kal. Hmyauk-Khayan khua le Shwebu khua karlak ah Pyosawhti nih an tlaih hna tiin khua chingchang kan theihngalh hna nih October 4 ah thawng a kan thanh,” tiah Lungcawi Pastor nih a chim.

Motorcycle pahnih in an kal pin ah ar phiarnak tangka ting 7 zong an i ken i, cu vialte cu Pyosawhti nih an lakpiak hna hnu ah an thah hna i a si lai, tiah an zumh.

Khua in an chuahnak ah zarh khat leng a si cang i, an thawngpang zong an theih ti hna lo tik ah Pyosawhti nih an thah hna i a si lai tiah an zumh. Asinain, an ruak cu khuami nih an hmu rih lo.

Nihin October 11 ah Pu Zaw Ni le Pu Bawi Kham ruakhumhnak le lungdomhnak cu an ruak um loin khuami nih an tuah, tiah thawngpang kan theih.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org