Nizaan November 26 ah Magwe ramtthen chung ah PDF bu 2 fonh (People’s Defense Force -Yenangyaung le Hunter Dragon Group) nih SAC ralhrang palik sakhaan pakhat an lak, tiah theih a si.
Hi SAC palik sakhaan hi ahlan zong ah PDF nih voi khat an rak lak cang nain SAC ralhrang nih bawmtu an thlah hna caah PDF pawl nih an kirtak tthanmi a si.
PDF chungtel pakhat nih, “Kap hnih kah i kahdohnak caan a rau ngai. Hi SAC sakhaan hi ahlan zong ah kan rak lak balmi a si. Asinain, kan rak kaltak tthan. Atu hi ni 3 chung kan i timhtuah hnu ah kan lak tthanmi a si,” tiah Irrawaddy thawngzamhnak ah a chim.
Nizaan zinglei ah PDF nih SAC ralhrang palik sakhaan cu an luh hnawh i, kahdohnak sau nawn a chuah hnu ah SAC ralhrang 8 an thi, a dang an zaam hna. PDF lei in ralkap 2 nih an nunnak an pek ve.
“Kanmah lei in ralkap 2 nih ram caah an nunnak an pek. SAC ralhrang lei in minung 8 a thimi an ruak le an meithal pawl kan char hna. SAC ralhrang nih raldohnak helicopter MI35 zong in a rak bawmh hna nain an sakhaan an chuahtak i an zaam dih,” tiah PDF ralkap nih a chim chap.
