Nizaan August 2, zinglei sml. 5:30 hrawng ah Malaysia ram, Kepong khua, Desa Jaya lamton pawng i hlei cung in Chinpa nih a fale pathum cu a hlonh hna i, amah zong a nunnak a laa ve, tiah thawngpang kan theih.
Thil sining a mit in a hmutu Malaysia rammi pakhat nih, “A fate pakhat hi a keng in aa puak. Cun, a dang pahnih i a kut in aa hruai hna. A keng in aa puakmi a fate cu hlei cung in a hlonh hmasa. Cu dih cun a dang fale pahnih zong a hlonh hna i amah pumpak zong hlei cung in a zuang,” tiah Sentul distrcit palik sin ah a chim.
Ahmasa ah a hlonhmi a fapate (A hniang bik, kum 3 hrawng) hi hlei tang lamkam hramh cung ah a tla i, hliamhma fak ngai a pu. Selayang sizung ICU ah an chiah i an zohkhenh cuahmah lio a si.
Ngakchia pahnih le hringtu pa belte cu a hmun ah an nunnak a liam, tiah Sentul palik nih media sin biachimnak ah an langhter.
A fale pathum hlei cung in a hlonh hnu hna ah amah zong aa thatmi Chinpa hi Thantlang peng, Ngaphaipi khua pawng Meisakotla khua ah a rak ummi a si, tiah niahniam minung pakhat nih The Chin Journal ah a chim.
“Malaysai a phak hlan ah hin Thantlang peng Meisakothla khua ah a ummi Puhpa Chohlei tiah an auhmi a si. A nupi rian a ttuan karlak ah hin amah nih a fale a zohkhenh tawn hna. Achelcaan ah a fale aa hruai hna i lam a lenpi tawn hna. Biaknak lei zong ah a lung um ngaimi a si. Khua pakhatkhat fak tuk in aa ruah sual caah a si kho men. Ngaihchia tuk a si,” tiah a chim.
Malaysia ramchung khuasa hna nih nan pawngkam ah lungthin lei in siseh thluak lei in siseh, damlonak a ngeimi an um i, bawmh an herh ahcun a tanglei phone number pawl ah hin pehtlaih khawh an si:
Mental Health Psychosocial Support Service: 03-2935 9935 or 014-322 3392; Talian Kasih at 15999 or 019-261 5999; Jakim’s (Department of Islamic Development Malaysia) family, Social and Community Care Centre at 0111-959 8214; and Befrienders Kuala Lumpur at 03-7627 2929 or go to befrienders.org.my/centre-in-malaysia for a full list of numbers nationwide and operating hours, or email [email protected].
