Nihin (Myanmar caan) zinglei sml. 1:30 ah an chuihmi World Cup Round 16 ah Argentina le Australia an i tong i Argentina nih 2-1 in an tei hna.
Atutan puai hi Messi caah bawlung a chuihmi puai 1,000 a tlinnak a si. Puai 1,000 a tlinh ni ah an ram caah goal 1 a sut i, 2-1 in Australia an tei hna hnu ah World Cup Quarter-Finals ah Argentina a kaipi khawh hna.
Messi hi kum 13 a si in Barcelona nih an rak lak cangmi a si i, Barcelona caah puai 778 a chuih. Goal 672 a kawlpiak hna.
An ram Argentina caah bawlung puai 169 a chuih i, goal 94 a sut. Argentina ram caah bawlung a chuihmi vialte lak ah goal tampi a suttu a si.
Paris Saint-German (PSG) ah aa ṭhial hnu ah PSG caah bawlung puai 53 a chuih i, atutan Australia le Argentina puai hi bawlung puai 1,000 a chuihnak a si.
Kum 35 a si tiang bawlung puai 1,000 a chuihmi ah goal 789 a sut cang. Amah he an chan aa tongmi Christiano Ronaldo hi atu tiang ah bawlung puai 1,144 a chuih cang i, goal 819 a sut ve cang.
Atutan World Cup Round 16 ah Argentina nih Australia an tei hna caah December 10 ah an chuih dingmi Quarter-Finals ah Netherlands he an i tong te lai.
