SAC ralhrang bawizik Min Aung Hlaing nih amah minung a simi Yangon ramtthen vuanci pa cu nihin March 23 ah thonginn chung ah a khumh tthan.
Atutan an tlaihmi pa hi Yangon ramtthen SAC sipuazi le chawlehthal lei vuanci a simi U Aung Tann Oo a si.
U Aung Tann Oo hi USDP palai a si i, 2020 thimnak ah Yangon ramtthen, Thanhlyin peng ah aa zuam nain a sungmi a si.
SAC nih rampi uknak an chuh hnu ah Yangon ramtthen chawlehthal lei vuanci ah rian an pekmi a si.
Nihin ah a zungkhaan ah an vung tlaih i, zei ruang ah dah an tlaih timi belte fiang in theih a si lo.
Nizaan March 22 zong ah Myanmar ramchung mirum bik pakhat a simi Crony Zay Kabar Shwe Khin le a fapa U Zay Thiha cu SAC ralhrang nih an tlaih hna i Insein thonginn ah an kuat colh cang hna.
